Manfred Uekermann föört JU NF aur‘t Ailön
Forleeren Seninj wiar di Junge Union Nuurđfriislön en hiil Aurner üp Söl. Dit ging diar tēmaatisk fuaral om di Sjuts fan di Weeterkant. Manfred Uekermann üt Ārichsem heer üüs aur’t Ailön föört en üüs diarbi fuul Nais aur Lön en Liren fortelt.
Didiar Dai her wü en uu sa dailk Weđer me en klaar blö Hemel en Senskiin her. Man jer wü ön Weesterlön bi di Baanhof tohup kām, skul wü jest me Toch aur di Hindenburg-Dam. Fan Weesterlön üt köört wü eeđer Südern. En Manfred Ueckermann dör üüs ön sin Wain alis aur Söl tö weeten: Söl es knap 100 km² gurt en heer ombi 21.000 Iinuuner. Hat jeft öntgihial twelev Tērper üp Ailön, man ja fordeel jam bluat aur fif Gimiindin, dit sen Hörnem, Kaamp, List, Woningstair-Brēderep en di Gurtgimiindi Söl. Bikeent es Söl fuaral om di binai 40 km lung Strön bi di Weesterkant. Diarom kum ek bluat ön Somer apskailig fuul Baarelir üp Ailön. Diartö kum ark Dai en Masi Aarberers fan’t hiili Nuurđfriislön me di Toch aur. Sa sen ön Somer bit hentö 150.000 Lir üp Söl en dit es mal wichtig fuar di Wertskep, ek bluat fuar‘t Ailön, uk fuar Nuurđfriislön en hiili Sleeswig-Holstiin.
Tetrapoden an der Hörnum Odde
Jer wü üüs di Hörnem-Or biluket her, wiar wü twesken Raantem en Hörnem āp üp en gurt Düne klateret. Fan diar üt kür wü aur di Dünemketing me sin Deelen en sin Hiirlönskep tö biir Siren di blö Nuurđsee se. Dial ön Hörnem önkemen, skul wü hen tö dit Süderjen fan’t Ailön, di Hörnem-Or. En jir uur ark Jaar bi ark Storem fuul Lön ofrewen. Jer kür em jir stünenlung rund laap, deling waaret dit niin Stün muar. Fuaral di Kersig-Siidlung es ön Gifaar, wan weđer san gurt Storem kumt. Man nü lii masi Tetrapooden bi Strön, om dit Lön diar achter tö skuanigin.
Injems köört wü da aur tö Munkmērsk. Diar bi di Haawen her arkjen wat tö drinkin fingen en wü snaaket jit om di Dai. Hat wiar fuar ali en dailk Dai üp Söl en wü kum ali hol weđer! Jer wü da weđer tüs raiset, sen wü jit en litjet döör Weesterlön löpen.
(Sölring – Sylter Friesisch)
