Daniel Günther as nei ministerpresident
De 07. Moi 2017 wiar at lidj uun hial slawik-holstian diartu apfördert an weele en nei lundai. De lundai as at huuchst poliitisk orgaan uun`t lun an ööwet a legislatiif meecht ütj. A lundaislidj fertreed hiar at hiale folk; jo steme auer nei gesetsen faan a regiaring uf an kontroliare hat liktidjig.
Juarling haa a lundaiswoolen för en mase feranringen surigt: At lunsregiaring oner Torsten Albig, ütj SPD, Grüne an SSW, hee sin muarhaid ferleesen an as ufweelet wurden. De nei lundai hee nü 73 lasmaate, det san fjauer muar üüs ferleeden woolperioode. He sat ham tup ütj seeks fraksjuunen: A CDU hee 25 lasmaate, a SPD 21, BÜNDNIS 90/DIE GRÜNEN tjin, a FDP njüügen an a SSW (partei faan a deensk manerhaid) trii lasmaate. A Piraten san ei muar banen, diarför as oober a AfD mä fiiw lasmaate iinj uun a lundai taanjen.
Autor: Benjamin Drozdz
Uun Nuurdfresklun wiar a woolütjgung iandüüdig. De woolkris 01 Nordfriesland-Nord hee de CDU-maan Ingbert Liebing faan Söl mä auer 45 % wonen. Klaus Jensen faan Pelweerem, uk CDU, hee a woolkris 02 Nordfriesland-Süd mä muar üüs 41 % wonen. Widjerhen sat Lars Harms (SSW) an Dr. Andreas Tietze (Grüne), bialen ütj Hüsem, uun a lundai. Jo san ei lik mä a iarst stem weelet wurden, man auer de naist stem (ham küd uk sai „auer list“) iinjtaanjen.
Al de 06. jüüne wiar a nei lundai at iarst feer tupkemen an hed ham konstituiirt. Lundaispresident as weler Klaus Schlie faan a CDU wurden. Man nü iarst, am a 28. jüüne, wiar at fersaamling, huar de nei ministerpresident weelet wurden skul. Diartesken san a kaolitionferhaanlingen tesken CDU, Grüne an FDP lepen. Jo haa ham nü tupslööden tu en „Jamaika Koalition“. Detheer moodel as för slaswik-holstian hial nei, man uun nuurdfresklun ütj a krisdai al bekeend.
Besuch in Nordfriesland
An nü wiitj wi beskias; de CDU-maan Daniel Günther hee weensdai, a 28. jüüne 2017, 42 faan 73 stemen fingen an as för de naist fiiw juar ministerpresident faan slaswik-holstian. Sin lunsregiaring stalt ham tup ütj Sozialminister Dr. Heiner Garg (FDP), Wirtschaftsminister Dr. Bernd Buchholz (FDP), Umweltminister Robert Habeck (Grüne), Finanzministerin Monika Heinold (Grüne), Bildungsministerin Karin Prien (CDU), Innenminister Hans-Joachim Grote (CDU) an Justizministerin Sabine Sütterlin-Waack (CDU). Mä Ingbert Liebing, iar bundesdaismaan, hee uk nuurdfresklun weler en fertreeder uun a lunsregiaring. Hi as tu en stootssekreteer berepen wurden an as för’t tupwerkin tesken luns- an bundesregiaring tustendig. Sin lundaismandaat moost hi diarför oober deellei. Efterfuliger faan Renate Schnack (SPD) as Johannes Callsen (CDU) wurden. Hi as nü de nei Minderheitenbeauftragter faan’t lun slaswik-holstian.
(Fering – Föhringer Friesich)
